Ululardan ulusan,
Həqiqətin yolusan,
Möcüzələr dolusan,
Sən ey gözəl Allahım.

Hər şeydən sən ucasan,
Bilmirik ki necəsən,
Qurandakı hecasan,
Sən ey gözəl Allahım.

Sənsən ümid-pənahım,
Sənsiz dilimdə ahım.
Əfv et, çoxdu günahım,
Sən ey gözəl Allahım.

Hər dərdə dərman səndə,
Məxluqat sənə bəndə,
Adın hər şeydən öndə,
Sən ey gözəl Allahım.

Arzu-diləyimizsən,
Daim gərəyimizsən,
Canda ürəyimizsən,
Sən ey gözəl Allahım.

Hər işdə hikmətin var,
Anlamaz səni əğyar.
Olansan bizlərə yar,
Sən ey gözəl Allahım.

Sənsiz olmaz karımız,
Sənsən dövlət-varımız.
Könlümüzdə nurumuz
Sənsən, gözəl Allahım.

Quran bizim yolumuz,
Nəğmə deyən dilimiz,
Eşqimiz, amalımız,
Sən ey gözəl Allahım.

Dilərik səndən imdad,
Söylərik zikir, əvrad.
Çəkdirmə bizə bir dad
Sən ey gözəl Allahım.

Bizlərə ver xoş övqat,
Yağdır rəhmətin qat-qat,
Hissiz qəlbləri oyat,
Sən ey gözəl Allahım.

Əflatun sənə möhtac,
Gözlərimi haqqa aç,
Etmə bizi yalavac,
Sən ey gözəl Allahım.