Əflatun Hüseynoğlu :
Dostum, ataq qəm-kədəri könüldən,
Bayram günü bir sevinək, bir gülək.
Çiçəklənsin ömrümüzün hər günü,
Başa varsın xoş arzular, xoş dilək.

İ. Babayev :
Çox nəğmə qoşmuşuq bülbülə, gülə,
Düşüb gül üstünə şeh gilə-gilə.
Vəsf edək bayramı biz gülə-gülə,
Kədəri itirək, sevinci bölək.

Ə. Hüseynoğlu :
Qiymət qoyduq həm yaxşıya, həm pisə,
Öz bəxtindən kim inciyə, kim küsə?
Bu günümüz keçib getdi nə isə,
Gələn günü ömrümüzə yar bilək.

İ. Babayev :
Tuş olmuşam neçə kərə qınağa,
Çəkilmişəm mən söz ilə sınağa.
İcazə ver bir söz deyim ay qağa,
Yaxşını saxlayaq, pisləri silək.

Ə. Hüseynoğlu :
Hər günümüz bir-birindən şad olsun,
Halal loxma ağzımızda dad olsun.
Yalan-qeybət qoy bizlərə yad olsun,
Yol tapmasın qarşımıza tor, kələk.

İ. Babayev :
Çoxalıbdır mərdə quyu qazanlar,
Başdan aşır şer-qəzəl yazanlar.
Düzəndən çox vardır işi pozanlar,
Gəl bir olaq, nanəcibə güc gələk.

Ə. Hüseynoğlu :
Ara qatan müxənnəti xar olsun,
Yaxşı dostu, mərd insanı var olsun.
Haq deyənə Tanrı özü yar olsun,
Lazım gəlsə mərd yolunda lap ölək.

İ. Babayev :
Dost yolunda ölümə də hazıram,
Deyişmədə bədahətən yazıram.
Söz əkəndə yerin dərin qazıram,
Gəl birləşək, ikimiz də bir əkək.

Ə. Hüseynoğlu :
Əl tutanın Haqq başından var ələr,
Əflatuna xoş sorağı tez gələr.
Harda olsa səs-sədası yüksələr,
Hesab edək xeyirxahı bir mələk.

İ. Babayev :
İdrisəm, yox mənim külüngüm, yabam,
Söz mülkündə mülkədaram, ərbabam.
Deyişmədə Əflatuna həmbabam,
İstəsən meydan aç, bir də deyişək.