Ac-yalavac tir-tir əsir, mənə nə?
Fəhlə-kəndli köpük qusur, mənə nə?

Qiymət qalxır, od eləyir günbəgün,
Yetim-yesir dad eləyir ünbəün,
Qarnım toxdur, kef çəkirəm özümçün.
Ac-yalavac tir-tir əsir, mənə nə?
Fəhlə-kəndli köpük qusur, mənə nə?

Günüm keçir restoranda, həm barda,
Yemək görsəm müftə əgər, mən orda,
Arvadlar da gecə-gündüz ah-zarda.
Ac-yalavac tir-tir əsir, mənə nə?
Fəhlə-kəndli köpük qusur, mənə nə?

Aşırıram neçə qabda bozbaşı,
Tez cumuram yağlı görsəm mən aşı,
Tanımıram o zaman da qardaşı.
Ac-yalavac tir-tir əsir, mənə nə?
Fəhlə-kəndli köpük qusur, mənə nə?

Deyirlər ki bahalanıb çörək də,
Canın çıxsın, get taxıl al, yer ək də,
Pulun yoxdur, nəyin varsa ver, ək də.
Ac-yalavac tir-tir əsir, mənə nə?
Fəhlə-kəndli köpük qusur, mənə nə?

Uşaq-muşaq durub üzə, işləmir,
Hərzə-hədyan sözlərini boşlamır,
Neyləyim ki, isti lavaş dişləmir.
Ac-yalavac tir-tir əsir, mənə nə?
Fəhlə-kəndli köpük qusur, mənə nə?