***
İsmimi sorarsınız,
Milyonlardan biriyəm.
Bircə loxma bəsimdir
Acıxdımsa kiriyəm.
Hələ canım suludu,
Hələ varam,diriyəm.
Aldırmasın bu könül,
Təntiməsin yaş,deyin,
Mənə şair deməyin,
Mənə vətəndaş deyin.
*
Gün apardı dənimi,
Qovrulmayır qorğası,
Zamana süvar oldum,
Yordu məni yorğası,
Hesabsız xətalarım
Qulağımın sırğası.
Qəbahətim,qüsurum
Duyulur,yavaş deyin,
Mənə şair deməyin,
Mənə vətəndaş deyin.
*
Çəkingənəm,bu halim
Uğurumu korladı,
Bakirə qədərimi
Həyat bivaxt zorladı,
Yemədim,pətəyimdə
Balım qaldı,xarladı.
Ərk eləyin,varımdı
Gözüm üstə qaş,deyin,
Mənə şair deməyin,
Mənə vətəndaş deyin.
*
Tiranlar öldü getdi,
Zülm,zillət bitmədi,
Üzümdən köləliyin
Qaraları getmədi,
Bir çimi çevirməyə
Fərasətim yetmədi.
İnsan oldum,nə fayda...
Torpaq deyin,daş deyin,
Mənə şair deməyin,
Mənə vətəndaş deyin.
***