***
Sayı unutmuşam barmaqlarımda...
Gündüz də,gecə də sevirəm səni.
Çöhrəni ağlımda qıza bənzədib
Ah,həyat,necə də sevirəm səni.
*
Sabah qoxuyursan umudlarıma.
Qoxuna uçuram,arı gəlirəm.
Mən sənin baharda çiçək yuxunam,
Xoşuna içindən sarı gəlirəm.
*
Son bahar dönürsən...
Dönür yenə də
Ruhuma o çılğın sel axşamlarım.
Biz ki gedəsiydik o dənizlərə...
Oturub gözləyir yel axşamlarım.
*
Gecə Ay enəndə su qucağına
Biz də öpüşərik nişanlı kimi.
Eşqindən o qədər sərxoş olaram...
Başım havasından dumanlı kimi.
*
Gözümə çəkirəm dualarımla,
Sonu bilinməyən filmimsən mənim.
Hətta,iztirabın o qədər xoş ki...
Ən gözəl zalimim,zülmümsən mənim.
*
Ah,həyat necə də sevirəm səni...
Aldığım,verdiyin nəfəs qalınca
Səni sevəcəyəm qadınım kimi,
Könlümdə bir qırnıx həvəs qalınca!
***