*****
Qoy atım içimdən nəyim var çölə,
Təkcə məhəbbəti qaytarın mənə.
Ölsəm də yolunda mən bilə-bilə,
Təkcə məhəbbəti qaytarın mənə.
*
Alın,şəkər kimi dilimə qoyun,
Zəliləm,fəqirəm ,əlimə qoyun,
Bir ağız oxusam zilimə qoyun,
Təkcə məhəbbəti qaytarın mənə.
*
Nəyimə gərəkdir var məhəbbəti,
Qəlbimdə anamın var məhəbbəti,
Övlad məhəbbəti,yar məhəbbəti-
Təkcə məhəbbəti qaytarın mənə.
*
Ağlımı şaşırmaz kimsələr belə,
Zəmzəm bulağında çimsələr belə,
Bu qara torpağa gömsələr belə
Təkcə məhəbbəti qaytarın mənə.
*
Heç nəsib olmadı haqdan butası,
Bircə qırıq bəsdi mənə çatası,
Min əzab versə də dərdi,xatası,
Təkcə məhəbbəti qaytarın mənə.
*
İstər dəli kimi baş alsın gəlsin,
Durna qatarında quş olsun gəlsin,
İstər gözlərimdə yaş olsun gəlsin,
Təkcə məhəbbəti qaytarın mənə.
***