*****
Mən özüm böyümüşəm,məni böyütməyiblər,
İlk tərbiyəverənim həyat olub əvvəldən.
Yay kimi əyilmişəm,neçə kərə əyiblər,
Sındıra bilməyiblər,sınmamışam hələ mən.
*
Anamın dizi üstü beşiyimdi sanmışam,
Dilimə ilk dəyən su gözümdəki yaş olub.
Oyunsuz,oyuncaqsız yatmışam,oyanmışam,
Mənim oyuncaqlarım torpaq olub,daş olub.
*
Qalxmışam yeriməyə.İlk addımım uğursuz,
Əlimdən tutmayıblar,büdrəyib yıxılmışam.
Mənim uşaq keçmişim,səndən ürək ağrısız,
Axı,neçə danışım,necə söhbət açım mən.
*
Nələr gəlib başıma,xatirələr söyləsin,
Ayağım yer tutana,ağlım söz kəsənədək.
Göylər yazan yazıdı,buna tale neyləsin,
Kədərin ömrü uzun,sevincin ömrü gödək.
*
Böyümüşəm çöllərdə tənha bir ağac kimi,
Dolu da döyüb məni,sərt qışdan da qorxmuşam.
Böyümüşəm hər günüm qayğıya möhtac kimi,
Tərli alınlardakı qırışdan da qorxmuşam.
*
Vaxt olub içərimdən alışıb yanmamışam,
Vaxt olub odun-ocaq od alıb atəşimdən.
Vaxt olub yaxşılığı zərrəcə qanmamışam,
Vaxt olub əvəzini on qat ödəmişəm mən.
*
Yaş qalağım görünür illərin sırasında,
İllər sıralandıqca tökülür qalam-qalam.
Dayanıb sabahımla indimin arasında,
Dünyam boyda dünyaya özüm boyda sualam.
***