***
Keçdi...
Keçirmişəm mən
Eşqi yazan vaxtımı.
Daha çiçək üfləyib
Sınamıram baxtımı.
*
İçimdə sel səngiyib,
Quruya bənd atıram.
Gecələri yatmıram,
Bayquşa qənd atıram.
*
Kimsə nəğmə oxuyur:
-Pəncərədən daş gəlir...
Süzülür aynasından
Gözlərimə yaş gəlir.
*
Bəlkə həmin qadındı-
Kəklimi sevən qadın.
Mənə şəkil göndərib
Şəklimi sevən qadın...
*
Bilmirəm ağlında mən
Necəymiş,nasılmışam.
Bəlkə də ölmüş bilib
Divardan asılmışam.
*
...Heç yaz yaxşı keçmədi.
Yağmadı.
Çöl qurudu.
Sarı kiraz ağacım
Qorxutdu yel,
qurudu...
*
Siqaranı buraxdım.
Həyat baha...
O qədər.
Bir az bira,bir az su...
İçməm daha o qədər.
*
Neçə doğru biləməm,
Neçə yalan,unutdum.
Adama pis baxırlar...
Sevgi-filan unutdum.
*
İncimirəm qoluma
İlişib kol çəkəndə.
Bir damla yaş bəsimdir
Gözlərim yol çəkəndə.
*
Kimsə nəğmə oxuyur:
-Pəncərədən daş gəlir...
Süzülür aynasından
Gözlərimə yaş gəlir...
***
Qənd-şeker
Ayna-cam
Kəkil-saç
Kol-dikenli ağac
*