***
Bir de,kim itirmiş,de kim tapacaq,
Bütün ömrüm boyu mən itirəni.
Vaxtsız ölüm belə qorxutmur,ancaq
Həyatı itirmək qorxudur məni.
*
Hələ düzəlməmiş nə qədər səhvim,
Ömür kitabımda neçə sual var.
Hələ dillənməmiş bəmdə sarı sim,
Hələ məhəbbət var,hələ vüsal var.
*
Hələ tapmamışam sirli adamı,
Hara baxıramsa ümman görürəm.
Dağlardan qayıdan əks- sədamı
Düzlərdə əriyib susan görürəm.
*
Dünya varlığımı bilməyib hələ,
Hələ axtarıram özüm özümü.
O qız görüşümə gəlməyib hələ,
Hələ yığmamışam yoldan gözümü.
*
Demirəm dünyaya şair doğuldum,
Məni şair edən kədərim oldu.
Bu gün həqiqətəm,dünən nağıldım,
Əlimdə qələmim kəsərim oldu.
*
Hələ yazmamışam gördüklərimi,
Bir dünya sevincim,bir dünya qəmim.
Hər məni axtaran tapmaz yerimi,
Sirli bir aləmdi mənim aləmim.
***

Ümman-deniz
Nağıl -masal
Əks-səda-yankı
Özüm özümü-kendikendimi
Kəsər-bıçak