LAYLA
Xocalıda düşmən təcavüzünə məruz qalmış körpələrə anaların dililə

Ya dənizsən, ya dəryasan, ya Kürsən,
Bu torpağa al qanını tökürsən.
Nə vaxtındı, Vətən dərdi çəkirsən,
Layla balam, layla balam, a layla!

Arxalanıb, söylə, balam, kimə sən,
Od-alova budur sinəm,- demisən!
Nədir belə, şir ürəyi yemisən?!
Layla balam, layla balam, a layla.

Yurd dediyin bahar-yazım, - nə bildin?
Al qanımla "Vətən" yazım, - nə bildin?
Bu torpaqda ölmək lazım, - nə bildin?
Layla balam, layla balam, a layla.

Hünərini böyüklərə ötür get,
Qeyrət əkdin, suvar, becər, bitir, get,
Bir hissin var, onu xalqa yetir get,
Layla balam, layla balam, a layla.

Sığan döy bu günün ağıza, dilə,
Dağ çəkdin obaya, dağ çəkdin elə.
Ürəyim ağrıyır, qıvrılma belə,
Layla balam, layla balam, a layla.

İntiqam ürəyə sərin gətirməz,
Allah nicatıma, inan, yetirməz.
Belə ölsəm, heç torpaq da götürməz,
Layla balam, layla balam, a layla.

Elbəyi Cəlaloğlu