***
Bəzən həyat məni elə yorur ki...
Qarın üstündə də yata bilirəm.
Günəşi aldadıb yağan yağmurun
Bir qaşıq suyunda bata bilirəm.
*
Bəzən həyat məni elə yorur ki...
*
Turşuyur,acıyır dadı dilimdə,
Gözümün içində mənalar itir.
Təkcə daşlar qalır şahı mat edən,
Taxtanın üstündə xanalar itir.
*
Bəzən həyat məni elə yorur ki...
*
Bəzən də insanlar sıxır canımı....
Günüm qara olur kömür gecədən.
Neyləsən məcburdur,gəlib keçəcək
Örkən doğanaqdan,ömür gecədən.
*
Bəzən həyat məni elə yorur ki,
Daşı daşım üstə qalası uçur.
Bülbül öyrədirdim gönlümə desin,
Baxdım ki,qarğanın balası uçur.
*
Bəzən həyat məni elə yorur ki...
*
Sıxır qəbahəti neçə illərin,
Hələ də məktuba Novruz olmağım.
Ağlım başımdaykən,sözüm ağzımda
Bir ovuc darıya xoruz olmağım.
*
Bəzən həyat məni elə yorur ki.
Yalquzaq adamın ov yorulmağı.
Gəlib özü boyda mərcə uduzub
Əlləri dəmirdə kov yorulmağı.
*
Bəzən həyat məni elə yoru ki...
*
Bəzən yoruluram sazın səsinə,
Sarıtel üstündə bayatı yorur.
Ruhumu türkülər,nəğmələr mənim,
Qarnımı əppəyin boyatı yorur.
*
Bəzən həyat məni elə yorur ki...
*
Çəkir dizlərimi səcdə yerinə,
Bitmir ibadətim.Qəzası böyük.
Atmışam tanrımı siqaret kimi,
Bilirəm məhşərdə cəzası böyük.
*
Bəzən həyat məni elə yorur ki...
***