***
***
Torpaqla üzümü yudum bu sabah,
şükrümü Tanrıdan əsirgəmədim.
Nə mutlu adamam,günəş də çıxmış,
həmin o işıqlı günəş,o qədim.
"
Qəribə qoxular gəlir burnuma,
nədir bu qoxular çilə çıxmamış.
Günəşi yığıram kipriklərimə,
hələ umudlarım pilə çıxmamış.
"
Yenə cığallayır könül xəyalım,
qayıdır o məsum,dümağ yerinə.
Cavab istəyirəm tut ağacından
bamazı finkamın yamaqlarına...
"
Yağış döyə-döyə,daş əzə-əzə,
nə yollar keçmədi yaş ayağımdan.
İllərdi əl çəkmir qancıq it kimi,
o yağış başımdan,daş ayağımdan.
"
Əllərim havalı ocaq közünə,
hələ ayağımda o nəmdən qalıb.
Dumanlı ağlımda ciggiltiləri,
sərçə xatirələr nənəmdən qalıb.
"
Durun a xəyallar,silkələməyin
bu papaq altında yatan oğlanı.
Allahdan qurbanla qazanla alıb
ömrünü bədava satan oğlanı.
"
Hələ uyqudayam,qış yuxumdayam,
bir gün oyanacam yaz havasına.
Atıb bu qələmi,atıb dəftəri,
özümü tutacam saz havasına.
"
O zaman üzümə günəş doğacaq,
alnım açılacaq qırışlarından.
Özümə bir saray,bir mülk tikəcəm,
bəxtimin bu qəpik quruşlarından.
"
Tanrım da dönəcək ədalətinə...
İşin avan olsun,avand!Mərhaba!
Mərhab deyəcək mənə mutluluq,
mərhaba deyəcəm,həyat mərhaba!
"""