***
***
Az qalıb quyruğun doğan vaxtına,
Burnuma payızın qoxusu gəlir.
Güzarı axşamın yağan vaxtına
Saçımda yağmurun yuxusu gəlir.
*
Yoxsa qorxusundan rəngi sarı mı?
Yamanca xoflanıb sıcağı günün.
Elə qurutdu ki,fidanlarımı...
Balasız qalaydı qucağı günün.
*
...Fırlanır boşuna yelqovanları,
Qovanı başına,yeli başına.
Hanı qaldırardı toz dumanları,
Dönüm o yellərin dəli başına.
*
Saralır quşların eşənəkləri,
Sərin budaqlarda buz sarmaşıqlar.
Hələ qarışmamış axşamın şəri,
Baxır eyvanlardan qız sarmaşıqlar.
*
Bir eşq oyalanır yaz yuxusunda,
Hərdən damcılayır şeh dodağına.
Mən də eləmişdim.
Naz yuxusunda
Bir öpüş vermişdim beh,dodağına...
*
Üstündə meh gəzir tərli sinəmin,
Bənzəyir yuxulu qızın əlinə.
Bir əl bulammadım fərli,sinəmin
Verimmi yaxasın güzün əlınə.
*
Deyəsən,o şeyin tərsi başlayır,
Demirəm...
Adını ayıb qoyarsız.
Sevdanın son payız dərsi başlayır,
Mənim qabağıma qayıb qoyarsız.
***