***
Mən səni sevəcəyəm...
Sevirəm deyəcəyəm,
Sənsə "yox" deyəcəksən...
Beləcə başlayacaq
bizim eşq hekayəmiz.
Əlindən tutacağam,
Əlini çəkəcəksən,
Sən çıxıb gedəcəksən,
Mən dönüb gedəcəyəm...
Beləcə başlayacaq
bizim eşq hekayəmiz.
Qırmızı geyəcəksən,
Mən bəyaz geyəcəyəm,
"Mənə yaz"-deyəcəyəm,
"Xoşcaqal" deyəcəksən.
Gözümü yumacağam,
Bir öpüş umacağam,
Sənsə "yox" deyəcəksən...
Beləcə başlayacaq
bizim eşq hekayəmiz.
Sən qrip olacaqsan,
Sənə zəng vuracağam,
"Necəsən"-soracağam,
"Ölürəm"-deyəcəksən.
Sən orda güləcəksən,
Mən burda güləcəyəm,
Beləcə başlayacaq
bizim eşq hekayəmiz.
Bir də görəcəksən ki,
gönlündə həyatınam,
Bir də görəcəyəm ki,
evimdə həyatımsan.
Sevirəm deyəcəyəm,
Sevirəm deyəcəksən,
Mən səni öpəcəyəm,
Sən məni öpəcəksən...
Bax böyləcə bitəcək
bizim eşq hekayəmiz...
*