***
Hələ başımdadır köhnə havalar,
İndi elə vaxtım,elə çağımdır
Hər hava üstündə oynamağım var.
Mənim yaşamağım oynamağımdır.
*
Köhnə havalara tamarzıyam,o
Qaval havasına,tar havasına.
Azmı oynamışam ayaqyalın mən,
Yağış havasına,qar havasına...
*...
Hələ başımdadır köhnə havalar,
Koroğlu havası-cəngi havası.
Bir az zaman üstə dəmi dəyişib,
Elə o vaxtkıdır rəngi,havası.
*
...Düşüb təqvimlərin vərəqlərində
Otuzun altında yaş axtarıram.
Fırlatdım Şeytana dəymədi,indi
Beşdaş oynamağa daş axtarıram.
*
Albayraq,ənzəli...
Hə,biri də var.
Gizlənpaç,açdım qaç...
Yuman elə mən.
Çox şeyə göz yumub dəm tuta-tuta,
Salıb itirmişəm gələ-gələ mən.
*
Bağım,xiyabanım xatirələrim,
Elə kövrəyəm ki,nar çiçəyində.
Üstündə gəzirəm arılar kimi,
Bütün varım,yoxum bar çiçəyində...
*
Hələ başımdadır köhnə havalar,
Torpağın havası,kəndin havası.
Hərləyib,fırlayıb nənəm yatanda
Qənddandan çaldığım qəndin havası...
*...
Bu qədər yaşadım,zarafat deyil,
Başım dərd içində, oyun içində.
Xəyalım fikrimin hüdudlarında,
Özüm qarğa-quzğun,qoyun içində.
*
Yaşımın göz vurur sarı işığı,
İçimdən bir acı,bir sızı gəlir.
Qorxuram böyürdən basıb keçməyə,
Bilirəm,dalınca qırmızı gəlir.
*
Başımda havalar,oynadır məni.
Adlarsam o yana,qəzası böyük.
Burda sən öl vurmaq,yalvarmaq keçmir,
Burda xətaların cəzası böyük...
*
Hansı xatirələr salır yadıma,
Həftəbir oyanıb sönən havamı.
Gözümü yaşardıb sədaqətiylə,
Saçımda bəyaza dönən havamı.
*
Deyirsən...
Həyatın harası gözəl,
Elə qüssəsi var,elə qəmi var.
"Vağzalı" üstündə yaşadır məni,
Hələ başımdadır köhnə havalar.
*...
Hələ başımdadır köhnə havalar,
Cırtdanın meşədə nağıl havası.
Üç yol ayrıcında qalmışam,yoxsa
Səs,işıq havası,ağıl havası.
*
Hər hava üstündə oynamağım var...
Sanki,ip üstündə gəzən biriyəm.
Yıxsan,yıxılsam da ağlamaram heç,
Mən ipə,kəndirə dözən biriyəm.
***