1992-ci il fevralın 26-sı səhər saat 5-də Ermənistan Silahlı Qüvvələri Rusiyanın 366-cı motoatıcı alayının iştirakı ilə Qarabağ vilayetinin Xocalı şəhərini (Xankəndi şəhərindən 14 km şimal-şərqdə) işğal edərkən, etnik azərbaycanlılara qarşı dəhşətli soyqırım törətmişdir. Həmin gün Xocalı bütünlüklə alova büründü. Mühasirəyə alınan şəhərdə qalmış təqribən 2500 nəfər xocalılı Ağdam rayonunun mərkəzinə çatmaq ümidi ilə şəhəri tərk etdi. Amma bir günün içində yer üzündən silinən şəhəri tərk edən 2500 Xocalı sakinindən 613-ü düşmən gülləsinə tuş gəlib qətliamın qurbanı oldu. Xocalı soyqırımı nəticəsində qətlə yetirilənlərin 63-ü uşaq, 106-sı qadın, 70-i qoca və qarı olmuşdur. Bundan başqa, 8 ailə tamamilə məhv edildi, 25 uşaq hər iki valideynini, 130 uşaq valideynlərindən birini itirdi. Düşmən gülləsinə tuş gəlib yaralanan 487 nəfərdən isə 76-sı uşaq idi. Həmin dəhşətli gündə 1275 xocalılı əsir, 150 xocalılı itkin düşdü. Əfəndilər, bu görünən tarixdir! Görün! Tanıyın! Xocalı qətliamını tanıyın! Çünki bu, Fransa kimi dövlətlərin uydurduğu qondarma “erməni qətliamı” deyil. Bu, 20 il öncə ermənilərin vəhşicəsinə törətdiyi Xocalı qətliamıdır. Lakin Xocalı qətliamını indiyədək yalnız Meksika və Pakistan dövlətləri tanıyıb. Əfəndilər, diqqətli olun! Yazın, yayımlayın! Yayımlayın ki, bu qətliamı bütün dünya tanısın! Yayımlayın ki, bir daha insanlar kütləvi olaraq öldürülməsin! Cəhalətə son qoyulsun!!!



Xocalı soyqırımında

Xocalı soyqırımında
Buz kimi qar ələnirdi.
Xocalı soyqırımında
Analar güllələnirdi.
Xocalı soyqırımında
Ürəkləri yarırdılar.
Gah bələkdə, gah yedəkdə
Körpələri qırırdılar.
Düşündükcə bu vəhşəti
Tər basır bütün bədəni.
Həmin gündə qar qarışıq
Yağdı silahlı erməni.

Xocalı soyqırımında
Analar güllənəirdi.
Körpəsi sağ qalırdısa
Düşüb qara bələnirdi.
Üşüdükcə körpə qəlbdə
Ana qoynu aranırdı.
Bu yuvasa güllələrlə
Dağıdılır, taranırdı.
Əl-ayağı bağlı bəbək
Dartınırdı bələyində.
Elə bil ki, insafı yox
Üzdalayan küləyin də.
Nə gülləni başa düşür,
Nə “erməni” anlayır o.
Bəlkə də öz şüurunda
Bir Allahı danlayır o.
Çox çəkmədən körpə üçün
Susdu həyat, bu məşəqqət.
Çirkinliyə üsyan edib
Dondu sümük, göyərdi ət...

Xocalı soyqırımında
Güllə insanlardan baha.
İlahi, belə günləri
Düşmən də görməsin daha!
Qocaları boğurdular,
Qadınları döyürdülər.
Suçsuz, bakirə qızları
Yumşaq desəm, söyürdülər.
Sonra da sırayla yıxıb
Sürüdülər, qaldırdılar.
Gülləyə qənaət edib
Döyə-döyə öldürdülər.
Dağıtdılar məscidləri,
Susdurdular azanları.
Qanına qəltan etdilər
Neçə-neçə cavanları.

Xocalı soyqırımında
Qar donunda od ələndi.
Xocalı soyqırımında
Atəş durub qar diləndi.
Həmin günü alaylarla
İblis, şeytan gəlirdilər.
Xocalını yer üzündən
Birdəfəlik silirdilər.

Xocalı soyqırımında
Göylərdən daş ələnirdi.
Körpələri qırırdılar,
Analar güllələnirdi.
Xocalı soyqırımında
Dünya mat qaldı vəhşətə.
Şəhəri anasız görüb
Qar da gəlmişdi dəhşətə.
Xocalı soyqırımında...
...Bilmirəm nə deyim, vallah.
Xocalı soyqırımında
Özün şahidiydin, Allah!!!

31.01.2012

Elbəyi CƏLALOĞLU