PARLADIN GÜNƏŞ KİMİ

Parladın Günəş kimi,
Bu gün birdən üzümə.
Sehirli şəfəqlərin
Nur çilədi gözümə.
Bu boyda məhəbbəti
Haralardan gətirdin.
Allahdan peyğəmbərə
İsmarıcmı yetirdin?
Söylə, hansı mələksən
Tanrının ocağında?
Nə cür ana bəsləyib
Səni öz qucağında?
Yanağında əksi var
Cənnət gülüstanının.
Gözün təcəssümüdür
Bir sevgi dastanının.
Səni sevməmək günah
Vallah, Haqqın yanında.
Bütün ahı, bezarı
Adam tapar canında.
Necə görsətdi mənə
Bilmirəm Tanrı səni.
Bəlkə elə özünsən
Gözəlliyin vətəni.
Bu nə duruş, nə baxış
Şükür sənə, ya Rəbbim!
İlhamım bir fırtına,
Ərşə dayanıb təbim.
Sən yeni həyat yolu,
Proton partlayışı.
Ey sevgi dünyasının
Təmannasız günəşi,
Vermərəm səni əldən
Bircə anlıq, qadası.
Əl çəkmərəm, gəlsə də
Dünyanın şah babası.
Sən məndən üz çevirib
Enerji doğurmasan,
Sən mənə ürəyində
Məhəbbət yoğurmasan,
Almasam əllərindən
Sevgi hərarətini,
Duymasam nəfəsindən
Tanrı məharətini
Nifrətimi gözümdən
Tükənməz ox edərəm,
Ayını, ulduzunu
Dünyadan yox edərəm.
Qalarıq sən ilə mən
Kainatda başbaşa.
Qeyri bir şey tapılmaz
Sənə, mənə yaraşa.
Sevərəm, əzizlərəm
Gözümdə bəbək kimi.
Sanaram öz dünyama
Allahdan kömək kimi.
Gəl, yaxına gəl, gülüm
Gəl oxşayım telini.
Cəvahirdən, incidən
Gəl qurşayım belini.
Anam gedər, anayın
Ağzı dəyər ağzına.
Elçi gedər dünyanın
Ən mükəmməl qızına.

Elbəyi Cəlaloğlu