İyrənmişəm

Yolda, tində duran itdən,
Siçan, sinək, sirkə, bitdən,
İlan-çayan, şərdən, şitdən,
İyrənmişəm bu mühitdən.

İkiüzlü, irsiz adam,
Dəymədüşər, dəli, dəngdən,
Yalan-palan, paxıl, əngdən,
İyrənmişəm bu mühitdən.

Zəli, zəngin, çalan əqrəb,
Çalağandan, ağlağandan,
Yaman, yalançıdan, yarəb,
İyrənmişəm bu mühitdən.

Şərxatadan, şərəfsizdən,
Tərbiyəsiz, tərəfsizdən,
Lovğa, lotu, eh o üzdən
İyrənmişəm bu mühitdən.
~~~~~~~~~~~~~~~~~~~~~


Qorxuram

Ay it, niyə hürürsən?
Dedi ki, qorxuduram.
Quyruğun da titrəyir,
Dedi mən də qorxuram.

Yaxşı məsəldi, məsəl
Tamam-kamal müfəssəl.
Qorxu canda olmalı,
Qorxu qanda olmalı.

Çoxalıbdı hürənlər,
Müftə ömür sürənlər,
Sülənən, sürünənlər,
Lal sükutdan qorxuram.

Nifrətdə, həm nisbətdə
İt də ikiüzlüdü.
Bir ismətdən, qismətdən,
Bir də itdən qorxuram.
~~~~~~~~~~~~~~~~~~