Aşıq Mürsəl Sinan, - biyar
(Şeir Türk aşığı Mürsəl Sinana
ithaf olunur)

Sefil Şenlik nə gəzirdin
Borçalını diyar - diyar ?
Sazın - sözün nökəridi
Aşıq Mürsəl Sinan, - biyar !

Aşıqlara məskən, oylaq
Qoca Tiflis, Qocor yaylaq,
Zurnam zildə, sazım oyaq,
Aşıq Mürsəl Sinan, - biyar !

Dədən dədəm, baban babam,
Sazdı soyum, suyum, havam,
Tülək tərlan, Türk oğluyam,
Aşıq Mürsəl Sinan, - biyar !

Göyü qaldıranda Ballı dərədən
Yer titrədi, Göy titrədi nərədən,
Ah çəkməzmi ahu dəyən zərbədən,
Aşıq Mürsəl Sinan, - biyar ?!

O, ahu tək dövrü - səfa sürdünmü,
“Əhli mərfət kamandarı gördünmü”,
Saz sinəndə, sözdən çələng hördünmü
Aşıq Mürsəl Sinan, - biyar ?!

Qoyub sapandına atıbdı səni,
Dəyərnə - dəyməznə satıbdı səni,
Qürbətli dünyama qatıbdı səni
Aşıq Mürsəl Sinan, biyar !

Xəbər al Şenlik babadan,
Oğuz eli Faxralıdan,
Atıcı Zuraf Musadan,
Aşıq Mürsəl Sinan, - biyar !

Dilin türlü, səsin türlü,
Sinəm axan Araz, Kürlü,
Mənəm, o, “Sınıx Körpü”lü,
Aşıq Mürsəl Sinan, - biyar !

Sən də qərib, mən də qərib,
Batan Günəş edər qürub,
Tanrım başa dərd əndərib,
Aşıq Mürsəl Sinan, - biyar !

Aya qurban, ilə qurban,
Aman deyən dilə qurban,
Səsindəki zilə qurban,
Aşıq Mürsəl Sinan, - biyar !

Bu nə dövran, bu nə çağdı,
Qar başıma haçan yağdı ?
Sənin kimi saçım ağdı
Aşıq Mürsəl Sinan, - biyar !

“Qadan alem” deyən ağlar
Dilinə, dininə qurban.
Sazın sızlar, sinəm sızlar
Aşıq Mürsəl Sinan, - biyar !

Aramızda nə dağlar var,
Gülər, göynəyər, ağlar var,
Barlı bağçalar, bağlar var,
Aşıq Mürsəl Sinan, - biyar !

Axan yaşım bıldır mənim,
Qəlbim incə, qıldır mənim,
Qars mənimdi, Çıldır mənim,
Aşıq Mürsəl Sinan, - biyar !

Aşığ Maqsud Fəryadinin
Fəryadından doyanmadım,
Fərağından oyanmadım,
Aşıq Mürsəl Sinan, - biyar !

Onun bircə “Layla de”sin
Heç axtarma, ələ düşməz,
Dil-dodaqdan lələ düşməz,
Aşıq Mürsəl Sinan, - biyar !

Sazın – sözün meydanında
Cövlan edən aşığ İslam
Azman, ustad, kamil ozan,
Aşıq Mürsəl Sinan, - biyar !

Söz – söhbəti ləldi, zərdi,
Nəhəng sənətkardı, nərdi,
Ərdi Musa Erdenanar,
Aşıq Mürsəl Sinan, - biyar !

Gördüm aşıq Gülabının
Gül qoxuyur, gül nəfəsi,
Onda var bülbül həvəsi
Aşıq Mürsəl Sinan, - biyar !

Batman gəlmiş, batman durmuş,
Bu sənətə möhür vurmuş
Bir heykəldi Veysəl babam,
Aşıq Mürsəl Sinan, - biyar !

Səsinə qurban aşığ,
Nəfəsinə qurban aşığ,
Həvəsinə qurban aşığ,
Aşıq Mürsəl Sinan, - biyar !

Nə istərsən oxu, aşığ,
Saz özümə, söz ruhuma yaraşığ,
Ay sinəsi dağ - dağ aşığ,
Aşıq Mürsəl Sinan, - biyar !

Fələk namərd, yağı yaman,
Pərən düşmüş zaman - zaman
Tərəkəmə Türküm, - obam,
Aşıq Mürsəl Sinan, - biyar !

Vətən birdi, dövlət ayrı,
Millət birdi, dövlət ayrı,
Qeyrət birdi, dövlət ayrı,
Aşıq Mürsəl Sinan, - biyar !

Kamandar, Əmrah, Alıyam,
Türk kökənli, Borçalıyam,
Saz - söz əhli, əhli – halam,
Aşıq Mürsəl Sinan, - biyar !

Ağrıdağ boyda ağrıdı,
Səsindəki nə yanğıdı,
Yanan Hüseyn Faxralıdı,
Aşıq Mürsəl Sinan, - biyar !
~~~~~~~~~~~~~~~~~~~~~~~~
18.08.2016 0:45