***
Gün qalxır,
dizini dirəyib yerə,
Utanır elə bil,üzü qızarır.
Qızıl toz səpir o üfüqlərinə,
Bu yerin ağ çölü,düzü qızarır.
*
Bomboz bir havanı döşünə almış
Çapır sabah yeli kəhərə minib.
Nə qədər xəyallar at üstündədir,
Nə qədər arzular yəhərə minib.
*
Soyuyur yanağı həftənin,ayın,
Soyuyur günlərin al dodağında.
Təqvimlər fışqırır ehtirasını
Son bahar öpüşü kal dodağında...
*
Hardadır o səda,o nalə,o səs?
Ruhu həzin olan qulaq kəsilir.
Dilindən dolayı bəlkə bir çinar,
Sözündən dolayı qovaq kəsilir.
*
Çəkir duyğuları özünə sarı,
Dağlar bəyaz başlı,gözü qürbətə.
Bir ana,sızlayan ayrılıqlara,
Dualar eyləyir üzü qürbətə...
*
Bu yerin gedəni son bahar dönər,
Xınalar allanar gəlin əlində.
Bir gəlin nazlanar qucağa düşüb,
Saçları giriftar əlin əlində.
*
Göz qırpır sallanıb bir xəzan yenə,
Səmada ağ quşlar...
Güzar axtarır.
Gizlənib gözündən sabah yelinin,
Bir xəzəl özünə məzar axtarır...

Gün qalxır dizini dirəyib yerə...
***