Göz yaşları

Birazca duzludu, birazca acı,
Damcılar göz yaşı, bəbəyin tacı,
Qovurar, yandırar, yanağın sacı,
Ağlamaq təsəlli, dərdin əlacı.

Bəsləyərsən bəbəyində bənd olar,
Yuvalanar, ocağ olar, kənd olar,
Axıdarsan zəhər, zəqqum, çən dolar,
Sevinc yaşı şəkər, şərbət, qənd olar.

Ürək gərək fərəhlənə, sevinə,
Sevda dolu, sevə, seçə, sevilə,
Qoşa axsa qoşa damcı qan, gilə,
Ağrı acı, aman acı, ah acı.

Məcbur olsa mənbəyindən üzülər,
Gah bulanıq, gahdan da saf süzülər,
Mənsəbinə düzüm - düzüm düzülər,
Göz yaşları fərəh, fəryad, fənd olar.

Ağlamaq hamının gələr başına,
Ağlayanda gərək könül qaşına,
Çox inanma hər axan göz yaşına,
Çağlar gedər, çaşan zehin, zənd olar.

Göz yaşları üzük, sırğa qaşları,
Gövhər, yaqut, məncə mərcan daşları,
Bəlalara salar gedər başları,
Hüseyn onda eh nə bilim, nə olar?
~~~~~~~~~~~~~~~~~~~~~~~~~~~
16.02.2013-cü il