YENƏ DƏ TƏKLƏNMİŞƏM

Yenə də təklənmişəm,
Yenə xəyalın gəlib
Mənə qənim kəsilmiş...
Kədərə arxalanıb
Mübarizə aparmaq
Heç də asan deyilmiş...

Yenə də təklənmişəm...
Yenə də ürəyimlə ağlım üz-üzə durmuş...
Ağlım “sevmə” - söyləyir...
“Bir ömrü bir sevgiyə
Qurban etmə”- söyləyir...
Amma ürək...
əvvəlki tək
Ata bilmir,
Məhəbbətin bu əzablı günlərini
"Qorxu" adlı "alverçiyə"”
Sata bilmir...

Yenə də təklənmişəm...
İllər ilə istisində isindiyim
İlk eşqimə sazaq gəlib...
İkimizə aid olan məhəbbətə
"Çağrılmamış qonaq" gəlib...

Anlamışam,
Səni çox-çox uzaqlara aparan da,
Acımadan ürəyimi parçalayan,
Varlığını ürəyimdən qətrə-qətrə qoparan da
“O” qonaqdır...
Təklənmişəm,
Bir dərdimdir,
Bir özüməm,
Bir otaqdır...

İncimirəm,
Gedirsənsə,yolun açıq!
Amma bir gün peşman olsan,
Nə məni gəz,nə də təkrar
Yoluma çıx...

Söz verirəm,
“Təklənməyə öyrəşəcəm...”
Bundan sonra adını da tutmayacam,
Dərdlərimlə “barışacam”,
Dərdlərimlə “dərdləşəcəm...”

Emin İbrahim