Yaz ay qələm

Hər zamanın, hər anın,
Öz hökmü, öz diqtəsi,
Hələ tezdi nöqtəsi,
Yaz ay qələm, durmadan.

De gəlsin nahaq, haqdan,
Yaradandan, qurandan,
Quruluşdan, Qurandan,
Yaz ay qələm, durmadan.

Qorxusu yox Qurandan,
Üzgün, üzə durandan,
Düzgün, süzüb vurandan,
Yaz ay qələm, durmadan.

Yaz alçaqdan, ahıldan,
Pakdan, paxır, paxıldan,
Zər, zəmidən, taxıldan,
Yaz ay qələm, durmadan.

Durğun, vurğun, vurmadan,
Badalaqdan, qurmadan,
Qurddan, quşdan, durnadan,
Yaz ay qələm, durmadan.

Neçə-neçə evsizdən,
Könülsüzdən, kefsizdən,
Təlimdən, təhsilsizdən,
Yaz ay qələm, durmadan.

Tənbəllərdən, kahaldan,
Kapitaldan, kalandan,
Rüşvət verən, alandan,
Yaz ay qələm, durmadan.

Halvaçıdan, halsızdan,
Yavanlıqlı, yalsızdan,
Abırsızdan, arsızdan,
Yaz ay qələm, durmadan.

Seldən, sudan, daşqından,
Milyon köçkün, qaçqından,
Mat qalan mal, mahaldan,
Yaz ay qələm, durmadan.

İnciklik iğtişaşdan,
İşğalçıdan, işğaldan,
Qadadan, qalmağaldan,
Yaz ay qələm, durmadan.

İmandan yaz, dindən yaz,
Şeytandan yaz, cindən yaz,
Misgərdən, miskindən yaz,
Yaz ay qələm, durmadan.

İcrasız qətnamələr,
Nağıl - mağıl namələr,
Kim məlundu, kim mələr,
Yaz ay qələm, durmadan.

Palançıdan, qırçıdan,
Dişlərini qırcıdan,
Qan axıdan “nurçu”dan,
Yaz ay qələm, durmadan.

Sən nəzər sal Xəzərə,
Nargin adlı məzara,
Baxtlar bada, bazara,
Yaz ay qələm, durmadan.

Nəşə axır sel kimi,
Xəfif əsən yel kimi,
Qırılırıq tel kimi,
Yaz ay qələm, durmadan.

Yazmağa mövzunmu yox?
Deməyə sözünmü yox?
Yoxsa ki, lüzummu yox?
Yaz ay qələm, durmadan.

Sevgidən, səadətdən,
Məcnundan, məhəbbətdən,
Ayrılıqdan, möhnətdən,
Yaz ay qələm durmadan.

Başı bağlı, şallıdan,
Yanaqları xallıdan,
Dodaqları ballıdan,
Yaz ay qələm, durmadan.

Xatirələr xal kimi,
Acı, şirin, bal kimi,
Alnımızda nal kimi,
Yaz ay qələm, durmadan.

Ürəyindən keçənlər
Ömürdən, gündən keçər,
Yazanlar candan keçər,
Yaz ay qələm, durmadan.

Sən qəddənmiş, mən qəmli,
Sən qədəhsən, mən nəmli,
Sən dəlisən, mən dəmli,
Yaz ay qələm, durmadan.

Ay Səngərli,
Qələm tutan barmağın
Mürəkkəbə bulaşmaz,
Durmaq bizə yaraşmaz,
Yaz ay qələm, durmadan.
~~~~~~~~~~~~~~~~~~~~
31.07.2011-ci il