Bağışlama heç vaxt səhvi kiməsə,
Səhvi bağışlamaq üzü bir səhvdir!
Səni qorxuzarsa dünyada nəsə,
Onun tək əlacı sadəcə məhvdir!

Qoyma ki, könlünə sevgi yol açsın,
Yumşaqlıq gətirir bu hiss ürəyə.
Yolunda məqsədin sənə nur saçsın,
Tək ona tabe ol, başqa heç nəyə!

Yol vermə ki, dəysin sənin xətrinə,
Kiminsə ağılsız, axmaq sözləri.
Uyma məhəbbətin heç vaxt ətrinə,
Unutma, kor olur onun gözləri.

Möhkəm ol, poladtək, sınma heç zaman,
Ürəyin şücaət hissiylə dolsun!
Baxma dərd tərəfə hətta uzaqdan,
Qəlbində həmişə qoy sevinc olsun!

Qorxunu məhv elə, qov ürəyindən,
İnsanın ən böyük odur düşməni.
Qorxma bu həyatın qar, küləyindən,
Tək özün itirmək qorxutsun səni!

Dostluq xülyasına aldanma heç vaxt!
Yoxdur bu dünyada dost ürəkli kəs!
Xeyirxah fikirdən sən dayan uzaq,
Zaman yelinə bax, onun kimi əs.

Bil, bu dünya meşə, bir cəngəllikdir,
Çalış şir olasan bu cəngəllikdə.
Qəddarlıq özü də bir gözəllikdir,
Əvəz etməz onu elm, bilik də.

İnanma insana, çiy süd əmibdir,
Qoyar yarı yolda, darda buraxar.
Atalar da bunu belə deyibdir,
İnsan öz beyninin meylinə axar.

Etibar etmə sən özündən ayrı,
Nəfəs ala bilən başqa canlıya.
İşində həmişə ol ayıq-sayrı,
Bil, dünya baş əyir dəliqanlıya!

İcazə vermə ki, bir başqasının,
Sənin meydanında çıxsın səsi gur.
Sən şirsən, unutma, şir balasının,
Heç nədən qorxusu, ürküsü olmur.

Həmişə düz yeri, ol vüqarlı dağ,
Baş əymə müqəddəs saymadığına.
Qoyma ki, bağında olsun bir alaq,
Heç zaman rəhm etmə düşmən, yağna.

Ehtiyatlı ol ki, hər addımında,
Kiçik bir səhvi də buraxmayasan.
Əlavə qüvvə, güc saxla canında,
Ki, hər bir işinə nöqtə qoyasan.

Getmə zərrə qədər güzəşt heç kimə,
Hətta öz qanından olana belə.
Qoyma təsir etsin xahiş qəlbinə,
Uyma yalvarışa, sən şirin dilə!

Tale göndərdiyi xoş günlərdən çox,
Verə biləcəyi acını gözlə!
Dediyin hər şeyi söz-söhbətlə yox,
Çatdır ən uzağı bir neçə sözlə.

Heç vaxt arzulama, dalma xəyala,
Zərər gətirərsən bunla canına.
Hər şeydə kamil ol, dön ideala,
Qiymət ver vaxtına, hər bir anına!

Çalış ki, ömürlük sənin ürəyin,
Buz tək soyuq olsun, daş kimi möhkəm.
Təsiri olmasın ona heç nəyin,
Baş versə bədbəxtlik hətta qəflətən.

Nəyəsə çatmaqçün, nail olmaqçün,
Çalışmaq lazımdır hər gün, hər gecə.
Sonunda gələcək gözlədiyin gün,
Əmin ol sən buna, gözlə sadəcə.

Hiss etmə özünü heç vaxt günahkar,
Qəlbini yükləmə belə nahaqdan.
Sənə qarşı olan bütün olanlar,
Qalsın yaddaşında, olma unutqan.

Unut ağlamağı, dərd-qəm etməyi,
Canlı həyat ilə dolu dünya qur.
Özünə yoldaş et deyib-gülməyi,
Şən insan gəncliyi çox uzun olur.

Özündə dönməz bir iradə yarat,
Cəsarət, güc, səbr olsun qanında.
Ağıldan iti ol, fikrində azad,
Cəsur bir döyüşçü olsun canında.

Çalışma kimisə təkrarlayasan,
Kimisə özündən üstün sayasan,
Çoxun zəhmətindən qorxub, çəkinib,
Aza bəs deyəsən, azla doyasan.

Uğursuzluqlardan üzülmə heç vaxt,
Heç kəsə zəhmətsiz verilmir tac-taxt.
Keçirsən vaxtını boş yerə, hədər,
Olarsan hər yerdə dəvətsiz qonaq.