Mənə Günəş demə... 
Günəşin canı çox yanır
Sənin gördüyün nədir!?
Dünyamı işıqlanır? 
Mənə dərya demə...
Dibi qaranlıq, çırpındığı sahilin lal daşlarıdır
Dalğalar oxşayır gözünü bəlkə
Dəryalar buludun göz yaşlarıdır... 
Üfüq boyananda qızıl libasa
Bir dəli ah çəkər kimsə, hardasa
Baxdığın dərələr, o uçurumlar
Bəlkə də ömrümün yoxuşlarıdır.. 
Gecələr sükutum, payız hisslərim
tökülən yarpaqlar ümidlərimdi
Gözünə dikilmir bəlkə gözlərim
O səni izləyən, səni axtaran
Bu dəli ruhumun baxışlarıdır....... 

 


QADIN

 Qadınlar siqaret çəkməz! 
Qadın dərd çəkər, həsrət çəkər
Nə o işdən əl çəkər, nə iş ondan əl çəkər
Daim qəlbi nigaran, daim gözü yol çəkər
Qadın şamdır, gizlində asta-asta əriyər
İşıqlanar ömürlər
Bəzən sönər o vaxtsız, bəzən neçə il çəkər! 
Qadın bitməyən kitab
Verilməyən dəyərdir
Bəs necə gətirir tab
Solduqca ləçəkləri
Başqa qönçə göyərdir!? 
Belə incə xəzanı
Başqa hansı gül çəkər?! 
Qadın aynadır şəffaf
Yaxşı bax sən özünə! 
Əlini çəksən ondan
Çəkməyi bilən qadın
YAŞAMAQDAN ƏL ÇƏKƏR!