Danış dilim

Nə yalan de, nə yaltaqlan,
Ya yaralan, ya paralan,
Ya da doğran dilim - dilim,
Danış dilim, danış dilim!

Torpaq dağ-dağ, qarış-qarış,
Bu nə sülhdü, bu nə barış?
Bu nə ötüş, bu nə yarış,
Nahaq axan qandan danış!

Zaman-zaman zara gələn,
Qəlblərini qəlpə dələn,
Yurd dağılmış, yurddaş pərən,
Yerdə qalan qandan danış!

Danış dilim, din, danış ki,
Qarabağın qara daşı,
Yağı vuran yara daşı
Qaysımamış, sağalmamış!

Danış dilim, torpaq dilim,
Ah - vay keçir ayım, ilim,
Göz görməsin belə zülüm,
Zülüm, zülümkardan danış!

Türkün qanına susayan,
Quduzlaşmış, cana qıyan,
Cani, cəllad, qəssablardan,
Qəsbkardan, qəsddən danış!

Qəsəbələr, bütöv şəhər
Silinibdi yer üzündən,
Aranı, dağı, düzündən,
Oba, oymağ, kənddən danış!

Bu dağıntı, talanların,
Axan günahsız qanların
Hesabını kim soracaq,
Necolacaq, ondan danış!

Qarabağım, Qaradağım
Qançırlamış qan yaddaşım,
Yubanırığ,ay yurddaşım,
Yum yumruğun, yurddan danış!

Tapdalanıb heysiyyatın,
Məhvə məhkum hissiyyatın,
Məziyyətin, keyfiyyətin,
Mənə mənəviyyatdan danış!

Nə müəmma, axı nə sir?
Yarpağ əsir, torpağ əsir,
Yeniyetmən əsir - yesir,
Yetim qalanlardan danış!

Ekrana baxıram, bağrım qan-qandı,
Gözlər qan çanağı, dopdolu qandı,
Cəsədlər odlara necə qalandı?
Öləndən, itəndən, qalandan danış!

Bir ana bətnində bələk görməmiş,
Dünyanın ləzzətin, lələk görməmiş,
Cırılan qarını Fələk görməmiş,
Cınqırın çəkməyən çağadan danış!

Vəd verən çox, vədəmiz yox,
Bəd bəd üstən, zədəmiz çox,
Kişimiz yox, gədəmiz çox,
Yalançı, yaltaxdan, yalandan danış!

Danış dilim, susma, danış,
Danışmağa nə yaz, nə qış,
Doğru sözə, düzə alqış,
Dostun, düşmənindən danış!
~~~~~~~~~~~~~~~~~~~~~~~~~~
26.02.2012-ci il