Ay Ağrıdağ

Başın dümağ, döşün duman,
Kimdi səndən nəsə uman?
Gözsüz qalsın gözəlliyə
Gözün yuman, ay Ağrıdağ!

Yamacların yaşıl orman,
Ya Beşbarmaq, ya Şahdağsan,
Murov, Qoşqara oxşarsan,
Oturaqsan, ay Ağrıdağ!

Söyləmişəm kərə - kərə,
Bənzərin var Babakərə,
Belə bizim Babadağa,
Əyriqara, ay Ağrıdağ!

Bünövrən, torpağın, daşın,
Əyilməzdi, dikdi başın,
Bilən varmı, neçə yaşın?
Yaman görmə, ay Ağrıdağ!

Abı - havan dərman-davan,
Səndə gəzən qalar cavan,
Daşnaklarla davan - şavan
Heç səngimir, ay Ağrıdağ!

Zirvən şiş, şeşpərdi, dağım,
Sənin yağın mənim yağım,
Yağıya sancıl yarağım,
Yaxşı yandır, ay Ağrıdağ!

Üzün ağdı, özünü öy,
Göylərin göy, döşünə döy,
Görməyirmi kənd - kəsək, köy,
Ağrın alım, ay Ağrıdağ!

O nə məbəd qabaq - qənşər?
Yəni xeyirdi, yoxsa şər?
Kordu, görmür bəlkə bəşər,
Anlatsana, ay Ağrıdağ!

Elə məğrur duruşun var,
Qarşıda qarı düşmənlə
Qanlı savaş, vuruşun var,
Var olasan, ay Ağrıdağ!

Hüseyin heyran hüsnünə,
Sim sinənə, dərd sərinə,
Qəm də çökməsin gözünə,
Hüzn görmə, ay Ağrıdağ!
~~~~~~~~~~~~~~~~~~~~
29.07.2011-ci il