Gözəl durnam

Ayaq saxla, bir an dayan,
Sən baysanmı, yoxsa bayan?
Bayaqdan gözüm səndədi,
Tellərini sayan durnam.

Qüvvət qanad, qollarına,
Çən çilənib yollarına,
Bir bax sağın, sollarına,
Qayğılıdı qayan, durnam.

Duruşuna durnam heyran,
Qıya çəkən zurnam heyran,
Cüyür, cüllüt, ceyran heyran,
Duman gələr, durma durnam.

Qatarını yaxşı yoxla,
Yan – yörəni iylə, qoxla,
Pusqudadı ovçun oxla,
Oxlar səni birdən durnam.

Duz səpilər, duz, aşıma,
Qan çıxmaz yerdən qaşıma,
Yaşın qarışar yaşıma,
Yaşam yaman çətin, durnam.

Məskənin çəmən, çöllərdi,
Dumduru bulaq, göllərdi,
Gəzdiyin bizim ellərdi,
Məhəbbətdə mətin durnam.

Sən haralı, mən haralı?
Günümüz ağlı, qaralı,
İkimiz də bir yaralı,
Kimdi kökün, zatın, durnam?

Vaqif söz dedi şəninə,
Yaşıl yaraşır əyninə,
Gələrdim toy törəninə
Töhvəm ilə, tövbə durnam.

Üz tutubdu Söyün sənə,
Kənd – kəsəyin, köyün sənə,
Öyünsənə, söyünsənə,
Göylər qızı gözəl durnam.
~~~~~~~~~~~~~~~~~~~~~
05.09.2012-ci il