Dərdimi çəkməyə fil axtarıram

Bəbə deyil, bəlli çıxdım bələkdən,
Zərrə - zərrə ələnmişəm ələkdən,
Gileyliyəm yerdən - göydən, fələkdən,
Zinharam, çəkməyə zil axtarıram.

Görmədi gözlərim çeşmə quruda,
Ağladı, çağladı, axdı duru da,
Artığ azalıbdı, gedib nuru da,
Korları oymağa mil axtarıram.

Ağla kaman, dağla kaman, amandı,
Ayrı düşmək, yalqızlıq nə yamandı,
Canda cəfa, cismim solmuş samandı,
Lilpar ləçəyində lil axtarıram.

Əli kərəntili, dəryaz, oraqlı,
Hardadı tay - tuşum, soydaş soraqlı,
Yaylaqlarım yağıntılı, quraqlı,
Giryanam, girməyə gil axtarıram.

Gələr keçər, ay dolanar, il olar,
Eldən ayrı dilim - dilim dil olar,
Eynim yaşı axar, yaxar, göl olar,
Çimirli çilləmdə çil axtarıram.

Hüseyin, hicranım say saz sarıdan,
Yaz yaşadan, yandırandı, zarıdan,
Dərd sinəmdə, qarışdıran, qarıdan,
Qayğımı çəkməyə fil axtarıram.
~~~~~~~~~~~~~~~~~~~~~~~~~~~
24.06.2012-ci il