***
Bu gün mənim doğum günüm...
Hamı oyaq mən yatmışam.
Kimsədən zəng gözləmirəm,
Telefonumu qapatmışam.
*
Saatın dili açılır,
Alır məni yuxulardan.
İçmişəm sanki,sərxoşam,
Özüm yorğun,başım duman.
*
Toz basmış yan yörəsini,
Saralmış yaşıl səmənim.
Təkcə təqvimlər bilir ki,
Doğum günüm bu gün mənim.
*
Xəyallar bu, ara-sıra,
Oyalayan şəksiz məni...
Fotolar divardan baxıb,
Qutlayır çiçəksiz məni.
*
Masamın üstü qurumboş,
Pastalar dükanda qalmış.
O bəbək xatirələrim
Uyumuş divanda qalmış.
*
Oturmuşuq,üzbəüzük,
Tək fotom mənə arkadaş.
Bir qədəh ovutmaz bizi,
İçək mi yenə,arkadaş.
*
Açıram iş telefonumu,
Mesaj yazıram özümə:
-Doğum günün qutlu olsun!
Ünvan qoyuram:"Özümə"
*
Səs gəlir...
Çölə baxıram.
Bəlkə,təbrikə gələnmiş.
Pərt oluram,pozuluram,
Sən demə,ağacdələnmiş.
*
Təqvimlərdə bitib gedir
Həyatımin ildönümü.
Qoparıram gözümdə yaş,
Divardan doğum günümü...
*
Bu gün mənim doğum günüm...
İçimdə bir qəriblik var.
Bir az qəmli,bir az da xoş...
Nə gözəlmiş bu duyğular.
***