GÖYLƏRƏ QALXAN HİLAL

Lap göylərə qaldırsaqda hilalı,
Qara yellər döndərəcək, onu bil.
Arxasında sözün, gücün olmasa,
Kimsə bir gün endirəcək , onu bil

Kimin gücü varsa özü böyükdür,
Keçərlidir, həm də sözü böyükdür,
Etiraf et, oğlu-qızı böyükdür,
Yoxsa zaman qandıracaq, onu bil.

Siyasəti biclər yazır,- dedilər:
Zor həmişə fəndi pozur,- dedilər:
Nər meydanda yaman qızır,- dedilər:
Ocağını söndürəcək , onu bil.

Altı qardaş ortaq olsa, bir olar,
Kürsülərdən haqq səsləri gur olar,
Millətlərin arasında yer olar,
Onda çıraq yandıracaq, onu bil.

Birlik üçün bircə yol var, elimdir,
Türkə lazım yeni baxış, təlimdir,
Xurafatla getmək olmaz, məlumdur,
Varlığını donduracaq, onu bil.

Coculunun dərdi, birlik dərdidir,
Savaşlarda dərdi, ərlik dərdidir,
Ən böyük dərdisə, varlıq dərdidir,
Yoxsa dövran sındıracaq, onu bil.