Bağ salıram şənüvə, Heydər baba!
İstədiyin meyvəsini dər, baba!

Yetdi əcəl ömrüvə, etdün vəfat,
Çıxmadı səndən sora bir ər baba.

Bir oğulun var idi səndən qalan,
Oldu sənün taxtuva sərvər, baba!

İndi onun dövrünə salsan nəzər,
Yazmağa yetməz mənə dəftər, baba!

Xalqıvun üstündə bazar qurdular,
İqtisadiyyat dedilər, nər baba!

Vergi deyib millətüvü ütdülər,
Görməmisən heç belə bərbər, baba!

İşləyənin haqqına göz qoydular,
Faizi artırdı kələntər, baba!

Qaz, su, işıq tarifi lap gülməli,
Bizlə gülürsənmi bərabər, baba!

Artım üçün benzini qaldırdılar,
Ərzaq alovlandı sərasər, baba!

Ölkə məzarlıq qazılıb millətə,
Təkcə qalıb baş daşı mərmər, baba!

İndi keçim mənəvi söhbətlərə,
Nə baş verir ölkədə əksər, baba!

Üzdən iraq, fahişələr çıxdılar,
Bunlar atıb gündəmə lövbər, baba!

Arvadı ər, arvad ərin paylaşır,
Ailədə qalmadı cövhər, baba!

Bəlkə efir halətini yazmıyım?
Orda olan ayrıdı ləngər, baba!

Müsiqidir yoxsa ki, ət bəhsidir?
Yoxdu o əvvəlki münəvvər, baba!

Ölkədəki halətin az parçası,
Namədi məndən sənə, rəhbər baba!

Ruhunu sıxdımsa əgər incimə.
Yoxdu bağın alması əhmər, baba!

Həm axı bu öz oğluvun dövrüdür,
Sən də sorarsan ona Heydər baba!

Müəllif: Anar Əhəd