Tarixin yaddaşına yazılacaq adımız,
Ölkələr arasında tanınacaq yurdumuz.
Ayıq-sayıq duraraq keşiyində ordumuz
Qoruyacaq hər zaman bu müqəddəs torpağı,
Yüksələcək, daima, Azərbaycan bayrağı.

Qəm-kədər silinəcək anaların üzündən,
Yaş-qəhər çəkiləcək qız-gəlinin gözündən,
Qurtulacaq qəlbimiz müharibə sözündən.
Dönməyəcək bir daha millətimin növrağı,
Yüksələcək, daima, Azərbaycan bayrağı.

Sülh sözü siləcəkdir könüllərdən qubarı,
Çiçək açıb güləcək yurdumuzun baharı.
Nurlara qərq olacaq yenə Odlar diyarı,
Şölələnib yanacaq Vətənin hər çırağı,
Yüksələcək, daima, Azərbaycan bayrağı.

Yetişəcək murada hər ülvi niyyətimiz,
İşıqlı bir gələcək olacaq qismətimiz.
Çarpışacaq bu yolda qəhrəman millətimiz,
Xoş günlərə çıxacaq hər körpəsi, uşağı,
Yüksələcək, daima, Azərbaycan bayrağı.

Uzaq deyil o günlər, zəfər günü gələcək,
Bu ulu xalq coşaraq düşmənini yenəcək,
Bir Vətən sevgisilə elim geri dönəcək.
Yenidən isinəcək babaların ocağı,
Yüksələcək, daima, Azərbaycan bayrağı.