TERANE TURAN RAHİMLİ

BU GÜN ONUNCU GÜNDÜ

Nəfəsim çatmır, Allah,
Boğazımda düyümdü.
On şəhəri yer uddu,
Bu gün onuncu gündü.

Viran qalan yurdların
Üstündə matəm sisi.
Ağlar buludlar gəzir
Osmaniyə, Kilisi.

Çökdü Qaziantepdə
İki min yaşlı qala.
Kim deyərdi Nur dağı
İki yerə yarılar?!

Uğultudan Afşində
Əshabi-Kəf oyandı.
24 oğuz boyun
Köksü qana boyandı.

Babalarım yüz illər
Ucaltdı yavaş-yavaş,
Yıxıldı Adıyaman,
Yerdə qaldı beton, daş.

Ulu Kahramanmaraş
İndi yerlə yeksandı.
Körpələr öldü deyə
Mələklər də utandı.

İlk tunc dövründən qalan
Tarix batdı Hatayda.
Qalxan toz dumanında
Gizlənib itdi ay da.

Belə dərd görməmişdi
Min illərdən bu yana
Bilqamıs dastanında
Adı keçən Adana.

Bulanıb Balıqlı göl
Ulu Şanlıurfada.
Peyğəmbərlər şəhəri
Qallb yaman cəfada.

Malatya, Diyarbakır -
Hər daşında qan izi.
İsgəndərun su altda,
Aşıb-daşdı dənizi.

Bağrın yandı, Türkiyəm,
Harda bir savaş oldu.
Taleyin nə amansız
Savaşına tuş oldun...

Daş üstündə qalmayan
Daşına qurban olum!
Gözünün qurumayan
Yaşına qurban olum!
15.02.2023.


ZƏLZƏLƏ TABLOSU

Nağıllarda ümid qapısı bilinən,
İşıq yolu, güc timsalı "7"-ni
İki dəfə gözdən salan
Fəlakətin sədasıdı zəlzələ.

Bir gün içində böyüyən
Altı yaşlı Zibeydənin
"Qardaşım Mevlut çox kiçik,
Ölə bilər" nidasıdı zəlzələ.

Dırnağıyla yeri qazan,
Ölən qızının əlini
Buraxmayan bir atanın
Son vidasıdı zəlzələ.

Dilsiz-ağızsız körpənin -
İyirmi günlük Kərəmin
Ovcundakı o bir tutam
Ana saçıdı zəlzələ.

İki yaşında Fatmaya
Ambulans pəncərəsindən
Baxan xilaskarlarının
Gözlərindəki acıdı zəlzələ.

Betonlar viranəsində
111 saatdı qorxan
Qızcığazın əcəliylə
Gizlənpaçıdı zəlzələ.

On yaşlı Hilal Bilginin
Daşlar altında əzilib
Kəsilən sağ qolu üçün
Təkcə suçludu zəlzələ.

Beton yığını içində
Namaz qılan gənc Adnanın
Yaşam savaşı önündə
Təbiətin utancıdı zəlzələ.

Sınaq kimi sınaq deyil,
Fələk zərbəsidi qəfil...
İnsanın başına gələn
Hər bəlanın, hər acının
Ən qorxuncudu zəlzələ.
10.02.2023.


BİRGƏ SARACAĞIQ BU YARANII DA

Bu torpağın udduğu can
Mənim yaralı canımdı.
O daşlardan sızıb axan
Öz ürəyimin qanıdı.

Vətənimin harayı var
"İmdad" çağıran hər səsdə.
Gənc arzuları boğulan,
Kəsilən körpə nəfəsdə.

Viran qalan şəhərlərin
Altında inləyən mənəm.
Başında durub ağlayan,
Fəryadın dinləyən mənəm.

Bu yuxusuz gecələrin
Bağrını yaran ahımdı.
Uçqunların hər qatında
Sıxılan mənim ruhumdu.

Məhvərindən qopur dünya,
Daşı, qayası laxlayır.
Fəğan edir yer-göy, Allah,
Bulud, səma yas saxlayır.

Yaradanın qıymadığı
Minillik qala yıxılır.
Şər yenə meydan oxuyur,
Dağılır, hər yer dağılır.

Gözə gəldimi Türkiyəm?
Acısı yandırıb yaxır.
Bir cocuğun gözlərindən
Dünyaların dərdi baxır.

Qəmin böyük, canım qardaş!
Yükün ağır, ağrın yaman...
Səninlə birgə saracaq
Bu yaranı Azərbaycan.

Çıxdın necə sınaqlardan,
Bilirsən, bu da keçəcək.
Düşən hər daşın yerində
Göyü dələn dağ bitəcək.
8. 02.2023.