Dəyişir.

Yadlaşır qohum-qardaş hətta bu millət dəyişir.
Adətlə ənənəmiz, həm də ki, “hörmət” dəyişir.

Qismətdən dəm vuraraq hər şeyi güclə alırıq,
Güclülər sözün deyir, onda da "qismət" dəyişir.

Görəndə vəzifəyə özün satan hər “kişini”,
Qeyrətdə şübhə olur, tez dönüb qeyrət dəyişir.

İşimiz tərs gələndə, alın yazıdan deyirik,
Düzələn tərs işlərdə yenidən söhbət dəyişir.

Gənclər də minnət ilə aşiq olur bir-birinə,
Məhəbbət şübhə ilə olur xəcalət, dəyişir.

Ağa qara deyənin artır “səxavətlə” payı,
İnsanlar çaş-baş qalır, dərhal ləyaqət dəyişir.

“ Qaşıqda hünərə bax, çömçəyə göstəriş verir”,
Çömçə də susur, gülür, etdiyi cürət dəyişir.

Ziyalı şər-böhtana söz deyəmmir, təslim olur,
Ziyalı deyəmmirsə, demək cəsarət, dəyişir.

Şeytana qulluq edən qarınqulu, boğaz güdən,
Çoxalıb, tüğyan edir, olan bərəkət dəyişir.

Ağsaqqal, ağbirçəyə hörmətlə qulluq azalır,
Yoxsa bizlərdə olan, abırla, ismət dəyişir?

Avropaya meyl edərək ,qərbləşirik asta-asta,
Gənclərin şüurunda, bizdəki adət, dəyişir.

Millətə “sadiq” olan dildən iti başı boşlar,
İş-güclə sınananda, çaşırlar, sifət dəyişir.

“ Yazıya pozu yoxdur”, söyləmiş bizim babalar,
Pozuruq hər tarixi, bizdə xasiyyət dəyişir.

Xeyirxah iş görənin qarşısına sədd çəkilir,
Paxıllıq tüğyan edir, artıq cəmiyyət dəyişir.

Evdə də sadiq olub, arvad, uşağa baxmırıq,
Artıq zaman belədir, vicdan, sədaqət dəyişir.

Vəzifə sahibləri qanunlara "qanun yazır",
Qanunlar işləməyir, artır cinayət dəyişir.

Dost, qardaş bir-birinə rüşvət ilə iş də görür,
İmkanlı imkansıza gülür, səxavət dəyişir.

Baxırsan,haqsız olan öyünür, haqdan danışır,
Qalırsan çaş-baş,yoxsa,bizdə kəramət dəyişir?

Allahın millətimə verdiyi hər neməti də,
Çatmayır millətimə, millətə “sərvət” dəyişir.

Yatırıq əhli kefik, düşmənlərsə iş görərək,
El-oba adlarını astaca, xələvət dəyişir.

Vəzifə axtarırıq, vətən, millət yaddan çıxır...,
Vətənə, vətəndaşda yoxsa, məhəbbət dəyişir?

Tənqidə əyri baxan, əyri olanlar çoxalır
Nədənsə, mintalitet itir, ədalət dəyişir.

Pula səcdə edənin say hesabı lap çoxalır,
Unudur din, imanı yoxsa şəriyyət dəyişir?

Sözünü anlayana söylə ki, Bayram, yozmasın,
Zəmanə həmənkidir, ondakı heyyət dəyişir…

2011