Sultan III. Osman’ın Tuğrası
Düstûr-ı mükerrem müşîr-i müfehham nizâmü’l-âlem müdebbir-i umûri’l-cumhûr bi’l-fikri’s-sâkıb mütemmim-i mehammi’l-enâm bi’r-re’yi’s-sâib mümehhid-i bünyân-ı devleti ve’l-ikbâl müşeyyid-i erkâni’s-sa‘âdeti ve’l-iclâl el-mahfûf bi-sunûfi ‘avâtıf-i’l-meliki’l-a‘lâ Diyarbekir Vâlisi Vezîrim (boşluk) Paşa edamallahu ta‘âlâ iclâlehu ve kıvetü’l-kudât ve’l-hükkâm ma‘deni’l-fazli ve’l-kelâm Mevlana Harpurut Kadısı zîde fazluhu tevkî‘-i refî’-i hümâyûn vâsıl olıcak ma‘lûm ola ki: Kazâ-i mezbûrda vâki‘ müteveffâ Hacı Hasan Baba Zâviyesinin berât-ı şerîfimle zâviyedârı ve vakfının mütevellisi (olan) dârende-i fermân vâcibü’l-iz‘ân kıdvetü’s-sulehâi’s-sâlikîn Şeyh Mehmed zîde salâhu Südde-i Sa‘âdetime ‘arzûhal idub zâviye-i mezbûr vakfının defter-i hakanîde mukayyed kazâ-i mezbûra tâbi‘ (boş) mezra‘asının mümtâz ve mu‘ayyen hudûdu dâhilinde kadîmden öşür ve resmi zâviye-i mezbûr vakfı tarafından alınagelan ma‘lûmetü’l-hudûd yerlerin öşür ve resmine âherden müdâhele olunmak îcâb itmez iken civârında vâki‘ evkâf karyelerinden (boş) nam vakıf karyenin zâbiti (boş) nam kimesne zuhûr ve ol yerler benim zâbiti olduğum vakf-ı mezbûrun sâlifü’z-zikr karyenin arazisindendir öşür ve resmin ben alırum deyu hilâf-ı kanûn ve mugâyir-i kadîm fuzûli müdâhale ve zâviye-i mezbûr vakfına gadr sevdâsında olduğun bildirüb mezbûrun hilâf-ı kanûn ol-vechle zâhir olan müdâhalesi men‘ u def‘ olunmak bâbında hükm-i hümâyûnum ricâ itmegin buyurdum ki: Hükm-i şerîfim vardıkda husûs-ı mezbûra tamam mukayyed ve tarafeynden Südde-i Sa‘âdetimden ihrâc olunmuş mühürlü sahîh sûret-i defter-i cedîd-i hakanî taleb idub göresin münâza‘un-fîha olan yerler dahl iden mezbûrun zâbiti olduğu mezbûrun mezkûr karyesinin mümtâz ve mu‘ayyen hudûdu dâhilinde kadîmden öşür ve resmi taraf-ı vakıfdan alınagelan yerlerden olmayub fi’l-vâki‘ zâviye-i mezbûrun mârü’z-zikr karyesinin mümtâz ve mu‘ayyen hudûdu dâhilinde kadîmden öşür ve resmi zâviye-i mezbûr vakfı tarafından alınagelan yerlerden iken mezbûr fuzûli hilâf-ı kanûn ve mugâyir-i defter ve kadime ol-vech müdâhale eyledügi vâki‘ ise men‘ u def‘ ve vech-i meşrûh üzere olan yerlerin öşür ve resmin kadîmisi üzere zâviye-i mezbûr vakfı tarafından buna ba‘de’l-hükm ahz u kabz itdiresin min-ba‘d kanûn ve deftere ve kadîme ve emr-i hümâyûnuma muhâlif kimesneye iş itdirmeyub vakfiyede alâkası ve medhali olmayanı karışdırmayub eslamiyanı yazub Astâne-i Sa‘âdetime ‘arz ve i‘lâm idub husûs-ı mezbûr içün bir dahi şikâyet olunub emrim varmağa muhtâc eylemeyesin şöyle bilesin alâmet-i şerîfe i‘timâd kılasın. Tahrîren fî evâhir-i cemâziye’l-evvel sene seb‘în ve mie ve elf (11-20 Şubat 1757).
Be-Makam-ı Kostantiniyye el-Mahrûsa
(Çeviren: Prof. Dr. Enver ÇAKAR)