Doğum günümə

Bu doğum günümdə anıb gəldiniz,
Deməyin, sevincdən coşdum, a dostlar!
Bihudə dünyada bütün segimi,
Bir yolluq Allaha qoşdum, a dostlar!

Haqqın dərgahında törədib qəza,
Çəkməyə gəlmişəm dünyada cəza.
Çevirib dərdimi bir tavar saza,
Varlıqdan yoxluğa düşdüm, a dostlar!

Gerçək ərənlərdən şövqlə dən vurun,
Sevgiylə əyilin, sayğıyla durun.
Çölümdə nə var ki, içimi görün,
Mən eşqin odunda bişdim, a dostlar!

Qoy, təlaş etməsin karıxan ürək,
Mənsiz haray çəkib darıxan ürək.
Ümidlə döyünür qəm sıxan ürək,
Həsrətdən qaynadım, daşdım, a dostlar!

Məni qınamasın mənsiz qalanlar,
Müqəddəs varlıqdır mənim olanlar.
Ərşə bülənd olub ifrat yalanlar,
Əzəldən gözlərdə yaşdım, a dostlar!

Saxtalıq gəzişir bəzəkli sözdə,
Tanrını görmədim hər gülən üzdə.
Talelər yazılıb Lövhi-məhfuzda,
Kim deyir, - həyatda çaşdım, - a dostlar!

Elbəyi verəmməz doğru bir qərar,
Çünki olammadı məhrəmi-əsrar.
Məni eşq yolunda gözləməzmi dar,
Mənsur tək zirvələr aşdım, a dostlar!

15.01.2012

Elbəyi Cəlaloğlu